कोरोना सिखाईस अपन भूईंया ह स्वर्ग आए

तरुण कौशिक कार्यकारी संपादक की कलम से...

पूरा दुनिया ह दो -ढा़ई महिना ले कोरोना महामारी वायरस नाव के बीमारी के डर म जीयत हवै अउ महामारी ल रोके बर देस - परदेस के मुखिया ह बने -बने कामबूता करत हवै। हमर छत्तीसगढ़ राज्य म कोरोना महामारी ल लेके सरकार ह अब्बड़ बने कामबूता करत हवै अउ इहां के चिकित्सक ,पुलिस मन के मेहनत ले हमन ए बीमारी ले जीत हासिल करत हन अउ हमर छत्तीसगढ़िया मुख्यमंत्री भूपेश बघेल के मांग म विशेष रेलगाड़ी चला के राज्य के गरीब मजदूर, किसान जउन अपन गांव -गली ल छोड़के दूसर राज्य कमाए - खाए गे रईस ओमन ल अपन भूईंया म आईस फेर अभू हमन कोरोना महामारी  ले बने ढ़ंग से जीत हासिल नई कर पाए हन ,हमन ल आवाईया फेरा म खुद ल सुरक्षित रखें बर पड़ ही।
 छत्तीसगढ़ राज्य के लाखों गरीब,किसान खेती -किसानी के बाद गर्मी के दिन म दूसर राज्य कमाए-खाए ल चले जाथे जेखर से एमन अपन भूईंया ल अउ रिस्तेदार मन ल भूला जाथे फेर  आज कोरोना महामारी म राज्य के ही नई बल्कि दूसर राज्य के लोगन मन दूसर राज्य म फंसे रईस अउ भूख मारे के दिन देखें ल हमर किसान, गरीब मजदूर मन  मिलिस ।जेखर से सीख लेके एमन अपन घर-द्वार आए बर हरसंभव कोशिश करिस । कोरोना महामारी ले लोगन ल बचाए बर सरकार द्वारा ढ़ाई महिना ले पूरा देस म धारा 144 कर्फ्यू अउ लॉकडाउन लागू करें ले मजदूर मन ल सरकारी मदद मिले के घलो बाद एमन अपन गांव-गली ,राज्य आए बर चिद करिस अउ हजारों के गिनती म गरीब मजदूर अपने छोटे- छोटे लईका, गर्भवती महिला मन रेंगत-रेंगत, साईकिल म हजार किलोमीटर के सफर कर के अपन राज्य ,घर- द्वार पहुंच के कोरोना महामारी के बीच म एमन ल मिले पीड़ा ल लोगन ल बतावत हवै अउ लोगन अपन संगी - संगवारी से कहत हवै के अपन भूईंया स्वर्ग आए ,अब हमन कभू कमाए-खाए ल अपन भूईंया ल छोड़के दूसर परदेस नई जान।
आज कोरोना महामारी के डर ले छत्तीसगढ़िया मन ल  छत्तीसगढ़ी फिचर " मोर छईंया भूईंया " के सुरता दिलागिस हवै जउन म अपन गांव अउ अपन पुरखा मन के खेती-किसानी के कामबूता ल मुख्य रुप ले दिखाए गे हे।निश्चित रुप ले आज कोरोना महामारी के डर ह हमन ल सिखाईस हवै के अपन घर-दूवारी ल छोड़के दूसर परदेस म कमाए -खाए जाना खुद के पांव म टंगिया मारे के समान आए। सरकार ह कोरोना महामारी कज बचाव बर लगातार अब्बड़ बने -बने कामबूता करत हे ।हमन ल अउ खासकर दूसर राज्य ले आए मजदूर मन ल ए बीमारी के बचाव बर खुद ल सुरक्षित करें के जरुरत हे। 
   छत्तीसगढ़ राज्य ह कोरोना महामारी ले शुरू ले जीत हासिल करें जात हे फेर अब हमन ल अभू अउ खुद ल सुरक्षित रखें बर पड़ ही ।चारों डहर कोरोना-कोरोना  के गोठ बात चलत हे।सरकार के चारों डहर तारीफ होत हवैं।अब हमर मुखिया भूपेश बघेल के संगेसंग देस के मुखिया नरेंद्र मोदी ल सोंचे ल पड़ही के हमर गरीब किसान मजदूर अउ पढ़े-लिखे लोगन मन ल अपनेच राज्य ,जिला म योग्यता अनुसार कामबूता मिले,का बर के अब जउन मन दूसर परदेस कमाए -खाए बर गे रईस ओमन के हाल ल देख के हमर राज्य के बात दूर दूसर परदेस के लोगन मन अब दूसर राज्य कमाए -खाए ल नई जाए ,कोरोना महामारी ह अब्बड़ बने सीख दिस हवै के अपन भूईंया ह स्वर्ग आए । सबो के इही कहना हवै के कोरोना ह हमन ल  सिखा दिस के  हमर धरती दाई के कोरा म स्वर्ग हवै अउ इहे कमाबो -खाबो अउ घर -दूवारी म रहिबो ।जय हो कोरोना के जउन ह  छत्तीसगढ़िया मन ल सिखाईस के छत्तीसगढ़ महतारी के कोरा म स्वर्ग हवै अउ हम सबो छत्तीसगढ़िया किसान, मजदूर मन मिलजुल के " धान के कटोरा " छत्तीसगढ़ के नाव ल दुनिया भर म फैलाबो ,तव फेर आवव मिलजुल के कोरोना के जय जयकार करहव जउन ह छत्तीसगढ़िया ल अपन छत्तीसगढ़ महतारी के गोद म ले आईस।